kisi ki mehrbaani se mohabbat mutmain kyaa ho — Nazeer Siddiqui

jis darja nek hone ki milti rahi hai daad
us darja nek banne kaa armaan kabhi na thaa

aae to dil thaa baagh baagh aur gae to daagh daagh
kitni khushi vo laae the kitnaa malaal de gae

raat se shikaayat kyaa bas tumhin se kahnaa hai
tum zaraa Thahar jaao raat kab Thaharti hai

abhi se vo daaman chhuDaane lage ho
jo ab tak mire haath aayaa nahin hai

aur hi vo log hain jin ko hai yazdaan ki talaash
mujh ko insaanon ki duniyaa mein hai insaan ki talaash

ham se shikaayatein bajaa ham ko bhi hai magar gila
pahle se ham nahin agar pahle se aap bhi nahin

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ishvon ki hai na us nigah-e-fitna-zaa ki hai
saari khataa mire dil-e-shorish-adaa ki hai

aane vaalon ki mohabbat hi bahut hai mujh ko
jaane vaalon se kahaan koi shikaayat hai mujhe

itni to did-e-ishq ki taasir dekhiye
jis samt dekhiye tiri tasvir dekhiye

phir apni is prem-kahaani par aayaa decline
ab vo mujh ko jin kahti hai aur main us ko Daain