shikastagi mein bhi kyaa shaan hai imaarat ki — Azhar Inayati

ghazal kaa sher to hotaa hai bas kisi ke liye
magar sitam hai ki sab ko sunaanaa paDtaa hai

raasto kyaa hue vo log ki aate-jaate
mere aadaab pe kahte the ki jiite rahiye

kisi ke aib chhupaanaa savaab hai lekin
kabhi kabhi koi parda uThaanaa paDtaa hai

vo jis ke sehn mein koi gulaab khil na sakaa
tamaam shahr ke bachchon se pyaar kartaa thaa

javaanon mein tasaadum kaise ruktaa
qabile mein koi buDhaa nahin thaa

har ek raat ko mahtaab dekhne ke liye
main jaagtaa huun tiraa khvaab dekhne ke liye

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

andheraa itnaa hai ab shahr ke muhaafiz ko
har ek raat koi ghar jalaanaa paDtaa hai

hamaare haal pe ab chhoD de hamein duniyaa
ye baar baar hamein kyuun bataanaa paDtaa hai

raushni DhunD ke laanaa koi mushkil to na thaa
lekin is dauD mein har shakhs ko jalte dekhaa

barhaman mujh ko banaanaa na musalmaan karnaa
mere saaqi mujhe mast-e-mai-e-irfaan karnaa