vo jis ke sehn mein koi gulaab khil na sakaa — Azhar Inayati

ghazal kaa sher to hotaa hai bas kisi ke liye
magar sitam hai ki sab ko sunaanaa paDtaa hai

shikastagi mein bhi kyaa shaan hai imaarat ki
ki dekhne ko ise sar uThaanaa paDtaa hai

raasto kyaa hue vo log ki aate-jaate
mere aadaab pe kahte the ki jiite rahiye

kisi ke aib chhupaanaa savaab hai lekin
kabhi kabhi koi parda uThaanaa paDtaa hai

javaanon mein tasaadum kaise ruktaa
qabile mein koi buDhaa nahin thaa

har ek raat ko mahtaab dekhne ke liye
main jaagtaa huun tiraa khvaab dekhne ke liye

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

yahi insaaf tire ahd mein hai ai shah-e-husn
vaajib-ul-qatl mohabbat ke gunahgaar hain sab

chheDaa agar mire dil-e-naalaan ko aap ne
phir bhuul jaaiyegaa bajaanaa sitaar kaa

kaabe se khinch laayaa ham ko sanam-kade mein
ban kar kamand-e-ulfat zunnaar barhaman kaa