aao husn-e-yaar ki baatein karein — Chiragh Hasan Hasrat

ghairon se kahaa tum ne ghairon se sunaa tum ne
kuchh ham se kahaa hotaa kuchh ham se sunaa hotaa

ik ishq kaa gham aafat aur us pe ye dil aafat
yaa gham na diyaa hotaa yaa dil na diyaa hotaa

ummid to bandh jaati taskin to ho jaati
vaada na vafaa karte vaada to kiyaa hotaa

raat ki baat kaa mazkur hi kyaa
chhoDiye raat gai baat gai

qubul is baargah mein iltijaa koi nahin hoti
ilaahi yaa mujhi ko iltijaa karnaa nahin aataa

yaa-rab gham-e-hijraan mein itnaa to kiyaa hotaa
jo haath jigar par hai vo dast-e-duaa hotaa

jab ki pahlu se yaar uThtaa hai
dard be-ikhtiyaar uThtaa hai

ijaazat maangti hai dukht-e-raz mahfil mein aane ki
mazaa ho shaikh-saahib kah uThein be-ikhtiyaar aae

nahin khel ai 'daagh' yaaron se kah do
ki aati hai urdu zabaan aate aate

koThe pe chehra-e-pur-nur dikhaayaa sar-e-shaam
yaar se rajat-e-khurshid kaa ejaaz huaa

ai 'hafiz' aah aah par aakhir
kyaa kahein dost vaah vaa ke sivaa

dushmanon se dosti ghairon se yaari chaahiye
khaak ke putle bane to khaaksaari chaahiye