Dar hai na dupaTTa kahin siine se sarak jaae — Riyaz Khairabadi

mai-khaane mein mazaar hamaaraa agar banaa
duniyaa yahi kahegi ki jannat mein ghar banaa

aap aae to khayaal-e-dil-e-naashaad aayaa
aap ne yaad dilaayaa to mujhe yaad aayaa

ghurur bhi jo karun main to aajizi ho jaae
khudi mein lutf vo aae ki be-khudi ho jaae

ham jaante hain lutf-e-taqaazaa-e-mai-farosh
vo naqd mein kahaan jo mazaa hai udhaar mein

baDe paak tinat baDe saaf baatin
'riyaaz' aap ko kuchh hamin jaante hain

aisi hi intizaar mein lazzat agar na ho
to do ghaDi firaaq mein apni basar na ho

ushshaaq ke aage na laDaa ghairon se aankhein
Dar hai ki na ho jaae laDaai tire dar par

mujhe na Dar hai qayaamat kaa ab na khauf-e-ajal
main dard-e-tark-e-mulaaqaat sah ke aaya huun

parind kyuun miri shaakhon se khauf khaate hain
ki ik darakht huun aur saaya-daar main bhi huun

udaasi akele mein Dar jaaegi
ghaDi-do-ghaDi ko khushi bhej de

maut se aage tak ke manzar dekhe hain
tanhaai se yunhi Dar nahin jaataa main

sangat dilon ki jivanon marnon kaa irtibaat
phir Dar paDaa thaa kyaa tujhe gird-o-navaah kaa