vaqt ko bas guzaar lenaa hi — Divakar Rahi

ain-fitrat hai ki jis shaakh pe phal aaeinge
inkisaari se vahi shaakh lachak jaaegi

bahut aasaan hai do ghunT pi lenaa to ai 'raahi'
baDi mushkil se aate hain magar aadaab-e-mai-khaana

sochne ki ye baat hai 'raahi'
sochte hi rahe to kyaa hogaa

ab to utni bhi mayassar nahin mai-khaane mein
jitni ham chhoD diyaa karte the paimaane mein

vaqt barbaad karne vaalon ko
vaqt barbaad kar ke chhoDegaa

abas ilzaam mat do mushkilaat-e-raah ko 'raahi'
tumhaare hi iraade mein kami maalum hoti hai

jab ki pahlu se yaar uThtaa hai
dard be-ikhtiyaar uThtaa hai

qatil ho ke bhi main apne qaatilon se laDaa
ki mere baa'd mire doston ki baari thi

naaseh ki nasihat se hai zid aur bhi dil ko
suntaa nahin hoshyaar ki divaana hamaaraa

itnaa hairaan na ho meri anaa par pyaare
ishq mein bhi kai khuddaar nikal aate hain

hamin se ajnabi lahje mein baat karti hai
hamaare ghar ki hamaare dayaar ki miTTi

pahunch gae hain ham aise dayaar mein ki 'vahid'
jahaan gunaah to laazim hai nekiyaan barbaad