apne dushman ko bhi mohabbat de — Dr. Yasin Aatir

dil ke andar yuun chhupaa rakkhaa hai ik teraa khayaal
jaise ik biij mein poshida shajar rahtaa hai

ab aa gayaa huun to dil mein utaar lenaa mujhe
bulaa ke paas mujhe raaegaan na kar denaa

main chaahtaa thaa miraa ishq laa-zavaal rahe
so maghfirat ki duaa maangtaa rahaa kal raat

tumhein hamesha zarurat pakaD ke laati hai
kabhi to aao mire ghar mire havaale se

ret ban kar miri muTThi se phisal jaati hai
ab mohabbat bhi sanbhaali nahin jaati mujh se

na jaane kaun si ghurbat hai meri aankhon mein
ki us badan mein khazaane talaash kartaa huun

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

'mir'-o-'ghaalib' bhi rahe ishq mein sarshaar miyaan
ab bhi fankaaron ke jiine kaa sahaaraa hai yahi

bajaT ki kai sakhtiyaan aur bhi hain
''abhi ishq ke imtihaan aur bhi hain''

shaairi jhuuT sahi ishq fasaana hi sahi
zinda rahne ke liye koi bahaana hi sahi

mohabbat aam saa ik vaaqia thaa
hamaare saath pesh aane se pahle