main subh khvaab se jaagaa to ye khayaal aayaa — Faizi

zulm kartaa huun zulm sahtaa huun
main kabhi chain se rahaa hi nahin

paD gayaa hai khudaa se kaam mujhe
aur khudaa kaa koi pata hi nahin

sochtaa kyaa huun tire baare mein chalte chalte
tu zaraa puchhnaa ye baat Thahar kar mujh se

kise DhunDtaa huun main apne qurb-o-javaar mein
ai firaaq-e-sohbat-e-dostaan mujhe kyaa huaa

jaane main kaun thaa logon se bhari duniyaa mein
meri tanhaai ne shishe mein utaaraa hai mujhe

achchhaa hai tu ne in dinon dekhaa nahin mujhe
duniyaa ne tere kaam kaa chhoDaa nahin mujhe

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

shor din ko nahin sone detaa
shab ko sannaaTaa jagaa detaa hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

taDap taDap ke tamannaa mein karvaTein badlin
na paayaa dil ne hamaare qaraar saari raat

kis pe khulte hain raat ke asraar
kaun yaan shab-guzaar hai aisaa