is jahaan mein nahin koi ahl-e-vafaa — Fana Bulandshahri

aaghaaz to achchhaa thaa 'fanaa' din bhi bhale the
phir raas mujhe ishq kaa anjaam na aayaa

uThaa parda to mahshar bhi uThegaa dida-e-dil mein
qayaamat chhup ke baiThi hai naqaab-e-ru-e-qaatil mein

ai 'fanaa' meri mayyat pe kahte hain vo
aap ne apnaa vaada vafaa kar diyaa

kyaa bhuul gae hain vo mujhe puchhnaa qaasid
naama koi muddat se mire kaam na aayaa

tamaam hosh ki duniyaa nisaar hai us par
tiri gali mein jise niind aa gai hogi

na dair mein na haram mein jabin jhuki hogi
tumhaare dar pe adaa meri bandagi hogi

ek aansu yaad kaa Tapkaa to dariyaa ban gayaa
zindagi bhar mujh mein ek tufaan saa paltaa rahaa

mire jurm-e-vafaa kaa faisla kuchh is tarah hogaa
sazaa kaa hukm fauri aur samaaat sarsari hogi

us dushman-e-vafaa ko duaa de rahaa huun main
meraa na ho sakaa vo kisi kaa to ho gayaa

aasaan nahin marhala-e-tark-e-vafaa bhi
muddat hui ham is ko bhulaane mein lage hain

ishq mein yaar gar vafaa na kare
kyaa kare koi aur kyaa na kare

taqdir-e-vafaa kaa phuuT jaanaa
main bhulaa na dil kaa TuuT jaanaa