hijr mein muskuraae jaa dil mein use talaash kar — Fani Badayuni

na ibtidaa ki khabar hai na intihaa maalum
rahaa ye vahm ki ham hain so vo bhi kyaa maalum

apni jannat mujhe dikhlaa na sakaa tu vaaiz
kucha-e-yaar mein chal dekh le jannat meri

ham hain us ke khayaal ki tasvir
jis ki tasvir hai khayaal apnaa

rone ke bhi aadaab huaa karte hain 'faani'
ye us ki gali hai teraa gham-khaana nahin hai

mujh tak us mahfil mein phir jaam-e-sharaab aane ko hai
umr-e-rafta palTi aati hai shabaab aane ko hai

yaa-rab tiri rahmat se maayus nahin 'faani'
lekin tiri rahmat ki taakhir ko kyaa kahiye

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

dil mein letaa hai chuTkiyaan koi
haae is dard ki davaa kyaa hai

paarsaai ki javaan-margi na puchh
tauba karni thi ki badli chhaa gai

hai qayaamat tire shabaab kaa rang
rang badlegaa phir zamaane kaa

yahaan kyaa dekhte ho naaseho ghar mein dharaa kyaa hai
mire dil ke kisi parde mein DhunDo yaadgaar us ki