us ke baare mein bahut sochtaa huun — Farhat Abbas Shah

baarish hui to ghar ke dariche se lag ke ham
chup-chaap sogvaar tumhein sochte rahe

kabhi sahar to kabhi shaam le gayaa mujh se
tumhaaraa dard kai kaam le gayaa mujh se

saans letaa huun to rotaa hai koi siine mein
dil dhaDaktaa hai to maatam ki sadaa aati hai

anaa ki jang mein ham jiit to gae lekin
phir us ke baad bahut der tak niDhaal rahe

use ziyaada zarurat thi ghar basaane ki
vo aa ke mere dar-o-baam le gayaa mujh se

main be-khayaal kabhi dhuup mein nikal aauun
to kuchh sahaab mire saath saath chalte hain

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

hai zaati soch zaruri ye zehn mein rakhnaa
dimaagh khaali ho tab log kaan bharte hain

hans magar hansne se pahle soch le
ye na ho phir umr bhar ronaa paDe

quvvat-e-fikr bhi di aise ki ik had mein raho
yaani be-kaar samajhdaar banaae gae ham

khiDkiyaan khol luun har shaam yunhi sochon ki
phir usi raah se yaadon ko guzartaa dekhun