hasti kaa raaz kyaa hai gham-e-hast-o-bud hai — Farhat Kanpuri

dil ki raahein judaa hain duniyaa se
koi bhi raahbar nahin hotaa

aankhon mein base ho tum aankhon mein ayaan ho kar
dil hi mein na rah jaao aankhon se nihaan ho kar

duniyaa ne khuub samjhaa duniyaa ne khuub parkhaa
meri nazar ko dekhaa jab aap ki nazar se

'farhat' tire naghmon ki vo shohrat hai jahaan mein
vallaah tiraa rang-e-sukhan yaad rahegaa

daulat-e-ahd-e-javaani ho gae
chand lamhe jo kahaani ho gae

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

ye aansu ponchh lijiye aur muskuraaiye
chaara nahin hai koi bhi rukhsat kiye baghair

husn jalva dikhaa gayaa apnaa
ishq baiThaa rahaa udaas kahin

hindu se puchhiye na musalmaan se puchhiye
insaaniyat kaa gham kisi insaan se puchhiye

un ki yaad mein bahte aansu khushk agar ho jaaeinge
saat samundar apni khaali aaankhon mein bhar laaungaa