'umr-bhar 'ahd-e-ta'alluq ke nigah-daar rahe — Fasih Akmal

har ek aankh mein aansu har ek lab pe fughaan
ye ek shor-e-qayaamat saa ku-ba-ku kyaa hai

hamin pe khatm hain jaur-o-sitam zamaane ke
hamaare baad use kis ki aarzu hogi

kitaabon se na daanish ki faraavaani se aayaa hai
saliqa zindagi kaa dil ki naadaani se aayaa hai

ab kisi aur kaa tum zikr na karnaa mujh se
varna ik khvaab jo aankhon mein hai mar jaaegaa

bahut si baatein zabaan se kahi nahin jaatin
savaal kar ke use dekhnaa zaruri hai

umr bhar milne nahin deti hain ab to ranjishein
vaqt ham se ruuTh jaane ki adaa tak le gayaa

kam-umri mein sunet hain
mar jaate hain achchhe log

baDe qalaq ki baat hai ki tum ise na paDh sake
hamaari zindagi to ik khuli hui kitaab thi

umr bhar kaun nibhaataa hai ta'alluq itnaa
ai miri jaan ke dushman tujhe allaah rakkhe

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

apne man mein Duub kar paa jaa suraagh-e-zindagi
tu agar meraa nahin bantaa na ban apnaa to ban