kachchi qabron par saji khushbu ki bikhri laash par — Hammad Niyazi

haar diyaa hai ujlat mein
khud ko kis aasaani se

main apne baap ke siine se phuul chuntaa huun
so jab bhi saans thami baagh mein Tahal aayaa

dikhaai dene lagi thi khushbu
main phuul aankhon pe mal rahaa thaa

vo peD jis ki chhaanv mein kaTi thi umr gaanv mein
main chuum chuum thak gayaa magar ye dil bharaa nahin

subh savere nange paanv ghaas pe chalnaa aisaa hai
jaise baap kaa pahlaa bosa qurbat jaise maaon ki

bas ek lamha tire vasl kaa mayassar ho
aur us visaal ke lamhe ko daaimi kiyaa jaae

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

shor din ko nahin sone detaa
shab ko sannaaTaa jagaa detaa hai

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

khairaat dene vaalaa pahle ye sochtaa hai
jo de rahaa huun us ke badle mein kyaa milegaa

gulshan ke kaarobaar mein bikti hai rangat is tarah
kis phuul mein khushbu hai kitni dekhtaa koi nahin