ishq mein be-taabiyaan hoti hain lekin ai 'hasan' — Hasan Barelvi

dekh aao mariz-e-furqat ko
rasm-e-duniyaa bhi hai savaab bhi hai

jaan agar ho jaan to kyun-kar na ho tujh par nisaar
dil agar ho dil tiri surat pe shaidaa kyuun na ho

dil ko jaanaan se 'hasan' samjhaa-bujhaa ke laae the
dil hamein samjhaa-bujhaa kar su-e-jaanaan le chalaa

o vasl mein munh chhupaane vaale
ye bhi koi vaqt hai hayaa kaa

kis ke chehre se uTh gayaa parda
jhilmilaae charaagh mahfil ke

gulshan-e-khuld ki kyaa baat hai kyaa kahnaa hai
par hamein tere hi kuche mein paDaa rahnaa hai

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

uThaa sakte nahin jab chuum kar hi chhoDnaa achchhaa
mohabbat kaa ye patthar is dafa bhaari ziyaada hai

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

tiri abru hai mehraab-e-mohabbat
namaaz-e-ishq mere par hui farz

sajda-e-ishq pe tanqid na kar ai vaaiz
dekh maathe pe abhi chaand numaayaan hogaa