ham aise log zaaea ho rahe hain — Haseebul Hasan

hamaare aansu kisi Thikaane to lag rahe hain
furaat ke bad-nasib paani kaa kyaa banegaa

tumhaari aankhon pe nazm kahne se pahle ham ne bhigoi aankhein
sunaa huaa thaa zamin nam ho to achchhi hoti hai kaasht-kaari

us ke meaar par khudaa laae
us nazar tak to aa gae hain ham

sitaare dekhne vaale hamein bataate hain
hamaare honT tumhaari jabin ko tarseinge

use bataanaa parinde use bulaate hain
use bataanaa ki shaair udaas hai us kaa

ye saath gaanv mein ek chhoTaa saa kaam hai bas
miri udaasi udaas mat ho main aa rahaa huun

main baDaa ho gayaa huun magar bachpanaa
mere dil se kabhi bhi gayaa hi nahin

meri arz-e-shauq be-maani hai un ke vaaste
un ki khaamoshi bhi ik paighaam hai mere liye

tumhaari yaad bhi chupke se aa ke baiTh gai
ghazal jo 'mir' ki ik gungunaa rahaa thaa main

kisi ko dekh ke chup chup se kyuun hue 'mohsin'
kahaan gae vo iraade sukhan-varon vaale

mere tikhe sher ki qimat dukhti rag par kaari choT
chikni chupDi ghazlein be-shak aap kharidein sone se

zamaana yaad kare yaa sabaa kare khaamosh
ham ik charaagh-e-mohabbat jalaae jaate hain