dasht ki dhuup hai jangal ki ghani raatein hain — Javed Nasir

aahaT bhi agar ki to tah-e-zaat nahin ki
lafzon ne kai din se koi baat nahin ki

khulti hain aasmaan mein samundar ki khiDkiyaan
be-din raaston pe kahin apnaa ghar to hai

bahut udaas thaa us din magar huaa kyaa thaa
har ek baat bhali thi to phir buraa kyaa thaa

dosto tum se guzaarish hai yahaan mat aao
is baDe shahr mein tanhaai bhi mar jaati hai

raat aa jaae to phir tujh ko pukaarun yaa-rab
meri aavaaz ujaale mein bikhar jaati hai

khudaa aabaad rakkhe zindagi ko
hamaari khaamushi ko sah gai hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

shor din ko nahin sone detaa
shab ko sannaaTaa jagaa detaa hai

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

roz ik taaza qasida nai tashbib ke saath
rizq bar-haq hai ye khidmat nahin hogi ham se

aah kartaa huun to aate hain pasine un ko
naala kartaa huun to raaton ko vo Dar jaate hain