judaa thi baam se divaar dar akelaa thaa — Javed Shaheen

samajh rahaa hai zamaana riyaa ke pichhe huun
main ek aur tarah se khudaa ke pichhe huun

thoDaa saa kahin jama bhi rakh dard kaa paani
mausam hai koi khushk saa barsaat se aage

Dubne vaalaa thaa din shaam thi hone vaali
yuun lagaa miri koi chiiz thi khone vaali

kuchh zamaane ki ravish ne sakht mujh ko kar diyaa
aur kuchh bedard main us ko bhulaane se huaa

hisaab-e-dostaan karne hi se maalum ye hogaa
khasaare mein huun yaa ab main khasaare se nikal aayaa

kis tarah be-mauj aur khaali ravaani se huaa
be-khabar dariyaa kahaan par apne paani se huaa

mohabbat karne vaale dard mein tanhaa nahin hote
jo ruThoge kabhi mujh se to apnaa dil dukhaaoge

yaar tanhaa ghar mein hai afsos lekin ham nahin
huur to hai gulshan-e-firdaus mein aadam nahin

chaman kharaab kiyaa, ho khizaan kaa khaana-kharaab
na gul rahaa hai na bulbul hai baaghbaan tanhaa

ek lamhe ke liye tanhaa nahin hone diyaa
khud ko apne saath rakkhaa jis jahaan ki sair ki

vo aise moD par mujh ko milaa thaa
main tanhaai kaa aadi ho chukaa thaa

dil ki dhaDkan bhi baDi chiiz hai tanhaai mein
teri khoi hui aavaaz sunaa karte hain