mohabbat karne vaale dard mein tanhaa nahin hote — Aazim Kohli

dukh pe mere ro rahaa thaa jo bahut
jaate jaate kah gayaa achchhaa huaa

'aazim' teri barbaadi mein sab ne mil-jul kar kaam kiyaa
kuchh khel lakiron kaa bhi hai kuchh vaqt ki kaar-guzaari bhi

baat chal niklegi phir iqraar ki inkaar ki
phir vahi bachpan ke bhule giit gaae jaaeinge

sabr ki takraar thi josh o junun-e-ishq se
zindagi bhar dil mujhe main dil ko samjhaataa rahaa

ham lakirein kured kar dekhein
rang laaegaa kyaa ye saal nayaa

zindagi sundar ghazal hai dosto
zindagi ko gungunaanaa chaahiye

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

vaqt ki kokh mein sulagtaa saa
meri hasti kaa gham paheli hai

lagtaa hai ki is dil mein koi qaid hai 'ashfaaq'
rone ki sadaa aati hai yaadon ke khanDar se

mire haath suljhaa hi leinge kisi din
abhi zulf-e-hasti mein kham hai to kyaa gham