kyuun maang rahe ho kisi baarish ki duaaein — Jazib Quraishi

teri khushbu pyaar ke lahje mein bole to sahi
dil ki har dhaDkan ko ik chehra nayaa mil jaaegaa

mire vajud ke khushbu-nigaar sahraa mein
vo mil gae hain to mil kar bichhaD bhi sakte hain

daftar ki thakan oDh ke tum jis se mile ho
us shakhs ke taaza lab-o-rukhsaar to dekho

kuchh mere dhaDakte hue dil ne bhi pukaaraa
kuchh aap ko baazaar mein dhokaa bhi huaa hai

miri shaairi mein chhup kar koi aur boltaa hai
sar-e-aaina jo dekhun to vo shakhs dusraa hai

mujh ko baDe khulus se barbaad kar diyaa
'jaazib' kisi ne ek havas-kaar ke liye

pyaaso raho na dasht mein baarish ke muntazir
maaro zamin pe paanv ki paani nikal paDe

aasmaan aisaa bhi kyaa khatra thaa dil ki aag se
itni baarish ek shole ko bujhaane ke liye

yaa abr-e-karam ban ke baras khushk zamin par
yaa pyaas ke sahraa mein mujhe jiinaa sikhaa de

qismat hi mein raushni nahin thi
baadal to kabhi kaa chhaT rahaa thaa

dasht phir kyon nahin rahe aabaad
abr aazaad hai havaa mahfuz

ye abr-e-nau hamaare kisi kaam kaa nahin
un ko pasand hi nahin baarish mein bhignaa