tanhaai ki dulhan apni maang sajaae baiThi hai — Kaif Ahmed Siddiqui

aaj kuchh aise shoale bhaDke baarish ke har qatre se
dhuup panaahein maang rahi hai bhige hue darakhton mein

tanhaaiyon ko saunp ke taarikiyon kaa zahr
raaton ko bhaag aae ham apne makaan se

khudaa maalum kis aavaaz ke pyaase parinde
vo dekho khaamushi ki jhiil mein utre parinde

'kaif' kahaan tak tum khud ko be-daagh rakhkhoge
ab to saari duniyaa ke munh par syaahi hai

sard jazbe bujhe bujhe chehre
jism zinda hain mar gae chehre

khushi ki aarzu kyaa dil mein Thahre
tire gham ne biThaa rakkhe hain pahre

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

kisi se zehn jo miltaa to guftugu karte
hujum-e-shahr mein tanhaa the ham, bhaTak rahe the

main kisi aankh se chhalkaa huaa aansu huun 'nabil'
meri taaid hi kyaa meri baghaavat kaisi

shaaeri ishq gham rizq kitaabein ghar-baar
kitni samton mein ba-yak-vaqt guzar hai meraa