khushi ki aarzu kyaa dil mein Thahre — Kaif Ahmed Siddiqui

tanhaaiyon ko saunp ke taarikiyon kaa zahr
raaton ko bhaag aae ham apne makaan se

khudaa maalum kis aavaaz ke pyaase parinde
vo dekho khaamushi ki jhiil mein utre parinde

'kaif' kahaan tak tum khud ko be-daagh rakhkhoge
ab to saari duniyaa ke munh par syaahi hai

sard jazbe bujhe bujhe chehre
jism zinda hain mar gae chehre

aaj phir shaakh se gire patte
aur miTTi mein mil gae patte

aaj kuchh aise shoale bhaDke baarish ke har qatre se
dhuup panaahein maang rahi hai bhige hue darakhton mein

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

tere gham se to sukun miltaa hai
apne shoalon ne jalaayaa ham ko

yahi dil jo ik buund hai bahr-e-gham ki
Dubo degaa sab shahr tufaan kar ke