is paraae shahr mein ai kaash koi ye kahe — Kashif Syed

aisaa na ho ki dosti bhi jaae haath se
ham haath mein gulaab liye sochte rahe

zaraa saa vaqt jo badlaa to ham pe hansne lage
hamaare kaandhe pe sar rakh ke rone vaale log

ham 'jaun-eliyaa' ke zamaane mein dosto
'ghaalib' kaa intikhaab liye sochte rahe

log ham se sikhte hain gham chhupaane kaa hunar
aao tum ko bhi sikhaa dein muskuraane kaa hunar

hijraton ke karb ko aise chhupaanaa hai tumhein
koi jab bhi haal puchhe muskuraanaa hai tumhein

shikasta naav samajh kar Dubone vaale log
na paa sake mujhe saahil pe khone vaale log

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

jab talak shisha rahaa main baar-haa toDaa gayaa
ban gayaa patthar to sab ne devtaa maanaa mujhe

usi ki tarah mujhe saaraa zamaanaa chaahe
vo miraa hone se zyaada mujhe paanaa chaahe

us but-e-kaafir kaa zaahid ne bhi naam aisaa japaa
daana-e-tasbih har ik raam-daanaa ho gayaa

ku-e-jaanaan mein na ghairon ki rasaai ho jaae
apni jaagir ye yaa-rab na paraai ho jaae