aisaa na ho ki dosti bhi jaae haath se — Kashif Syed

zaraa saa vaqt jo badlaa to ham pe hansne lage
hamaare kaandhe pe sar rakh ke rone vaale log

is paraae shahr mein ai kaash koi ye kahe
raat kaa khaanaa hamaare saath khaanaa hai tumhein

ham 'jaun-eliyaa' ke zamaane mein dosto
'ghaalib' kaa intikhaab liye sochte rahe

log ham se sikhte hain gham chhupaane kaa hunar
aao tum ko bhi sikhaa dein muskuraane kaa hunar

hijraton ke karb ko aise chhupaanaa hai tumhein
koi jab bhi haal puchhe muskuraanaa hai tumhein

shikasta naav samajh kar Dubone vaale log
na paa sake mujhe saahil pe khone vaale log

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

jinhein ye fikr nahin sar rahe rahe na rahe
vo sach hi kahte hain jab bolne pe aate hain

main sochtaa huun is liye shaayad main zinda huun
mumkin hai ye gumaan haqiqat kaa gyaan de

reg-e-dil mein kai naadida parinde bhi hain dafn
sochte honge ki dariyaa ki ziyaarat kar jaaein

jab bhi ye sochne lagtaa huun ki kaun apnaa hai
zehn mein aa ke kai naam nikal jaate hain

is soch mein zindagi bitaa di
jaagaa huaa huun ki so rahaa huun