havas ne toD di barson ki saadhnaa meri — Krishn Bihari Noor

sach ghaTe yaa baDhe to sach na rahe
jhuuT ki koi intihaa hi nahin

itne hisson mein baT gayaa huun main
mere hisse mein kuchh bachaa hi nahin

jitne mausam hain sabhi jaise kahin mil jaaein
in dinon kaise bataaun jo fazaa hai mujh mein

mausam hain do hi ishq ke surat koi bhi ho
hain us ke paas aaine hijr-o-visaal ke

ho vaapsi agar to inhein raaston se ho
jin raaston se pyaar tiraa le gayaa mujhe

main jis ke haath mein ik phuul de ke aayaa thaa
usi ke haath kaa patthar miri talaash mein hai

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

baDi mushkil se ye jaanaa ki hijr-e-yaar mein rahnaa
bahut mushkil hai par aakhir mein aasaani bahut hai

namak bhar kar mire zakhmon mein tum kyaa muskuraate ho
mire zakhmon ko dekho muskuraanaa is ko kahte hain

khud apni diid se andhi hain aankhein
khud apni guunj se bahraa huaa huun