main jis ke haath mein ik phuul de ke aayaa thaa — Krishn Bihari Noor

itne hisson mein baT gayaa huun main
mere hisse mein kuchh bachaa hi nahin

jitne mausam hain sabhi jaise kahin mil jaaein
in dinon kaise bataaun jo fazaa hai mujh mein

mausam hain do hi ishq ke surat koi bhi ho
hain us ke paas aaine hijr-o-visaal ke

ho vaapsi agar to inhein raaston se ho
jin raaston se pyaar tiraa le gayaa mujhe

main to ghazal sunaa ke akelaa khaDaa rahaa
sab apne apne chaahne vaalon mein kho gae

sach ghaTe yaa baDhe to sach na rahe
jhuuT ki koi intihaa hi nahin

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

cigaretein chaae dhuaan raat gae tak bahsein
aur koi phuul saa aanchal kahin nam hotaa hai

ham ne ye soch ke chheDaa thaa fasaana gul kaa
is bahaane hi tire zikr kaa pahlu nikle

yuun chaar din ki bahaaron ke qarz utaare gae
tumhaare baa'd ke mausam faqat guzaare gae