bane hain kitne chehre chaand suraj — Mahtab Alam

aansuon ke jahaan mein rahte hain
ham isi kahkashaan mein rahte hain

zehn aise bhi na ban jaaein nisaabon vaale
guftugu mein bhi huun alfaaz kitaabon vaale

ik safar phir mari taqdir huaa jaataa hai
raasta paanv ki zanjir huaa jaataa hai

naaqido tum to mire fan ki parakh rahne do
apne sone ko main pital nahin hone dungaa

dil bhi toDaa to saliqe se na toDaa tum ne
bevafaai ke bhi aadaab huaa karte hain

ye san kar meri nindein uD gai hain
koi meraa bhi sapnaa dekhtaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

so jaaiye huzur ki ab raat ho gai
jo baat hone vaali thi vo baat ho gai

shab-e-firaaq yahi mashghala hai aashiq kaa
kabhi charaagh jalaanaa kabhi bujhaa denaa

jo din chaDhaa to hamein niind ki zarurat thi
sahar ki aas mein ham log raat bhar jaage