ham kaaenaat-e-sidq ko saanche mein Dhaal kar — Matin Niazi

aise khoe sahar ke divaane
lauT kar shaam tak na ghar aae

tufaan se bach ke Duubi hai kashti kahaan na puchh
saahil bhi e'tibaar ke qaabil nahin rahaa

gham-e-insaan ko siine se lagaa lo
ye khidmat bandagi se kam nahin hai

yahi aaina hai vo aaina jo liye hai jalva-e-aagahi
ye jo shaaeri kaa shuur hai ye payambari ki talaash hai

gham-e-maaal gham-e-zindagi gham-e-dauraan
hamaare ishq kaa charchaa kahaan kahaan na rahaa

agar duniyaa tujhe divaana kahti hai to kahne de
vafaadaaraan-e-ulfat par yahi ilzaam aataa hai

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

pahaaD bhaanp rahaa thaa mire iraade ko
vo is liye bhi ki tesha mujhe uThaanaa thaa

nai tahqiq ne qatron se nikaale dariyaa
ham ne dekhaa hai ki zarron se zamaane nikle

hairat se dekhtaa huaa chehra kiyaa mujhe
sahraa kiyaa kabhi kabhi dariyaa kiyaa mujhe

ai shaaer! teraa dard baDaa ai shaaer! teri soch baDi
ai shaaer! tere siine mein is jaisaa laakh bahe dariyaa

kabhi sar pe chaDhe kabhi sar se guzre kabhi paanv aan gire dariyaa
kabhi mujhe bahaa kar le jaae kabhi mujh mein aan bahe dariyaa