kabhi sar pe chaDhe kabhi sar se guzre kabhi paanv aan gire dariyaa — Ali Akbar Abbas

zaraa haTe to vo mehvar se TuuT kar hi rahe
havaa ne nochaa unhein yuun ki bas bikhar hi rahe

main bhari saDkon pe bhi be-chaap chalne lag gayaa
ghar mein soe log mere zehn par yuun chhaa gae

main khoe jaataa huun tanhaaiyon ki vusat mein
dar-e-khayaal dar-e-laa-makaan hai yaa kuchh aur

main apne vaqt mein apni ridaa mein rahtaa huun
aur apne khvaab ki aab-o-havaa mein rahtaa huun

apnaa aap nahin hai sab kuchh apne aap se niklo
badbuein phailaa detaa hai paani kaa Thahraao

ai shaaer! teraa dard baDaa ai shaaer! teri soch baDi
ai shaaer! tere siine mein is jaisaa laakh bahe dariyaa

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

himmat-e-tark-e-vafaa Duub gai
kis ne aankhon mein utaaraa dariyaa

mohabbat mein kaThin raste bahut aasaan lagte the
pahaaDon par suhulat se chaDhaa karte the ham donon

ek dariyaa paar kar ke aa gayaa huun us ke paas
ek sahraa ke sivaa ab darmiyaan koi nahin

jahaan dikhaai na detaa thaa ek Tiila bhi
vahaan se log uThaa kar pahaaD laae hain

ye us ke pyaar ki baatein faqat qisse puraane hain
bhalaa kachche ghaDe par kaun dariyaa paar kartaa hai