ai shaaer! teraa dard baDaa ai shaaer! teri soch baDi — Ali Akbar Abbas

zaraa haTe to vo mehvar se TuuT kar hi rahe
havaa ne nochaa unhein yuun ki bas bikhar hi rahe

main bhari saDkon pe bhi be-chaap chalne lag gayaa
ghar mein soe log mere zehn par yuun chhaa gae

main khoe jaataa huun tanhaaiyon ki vusat mein
dar-e-khayaal dar-e-laa-makaan hai yaa kuchh aur

main apne vaqt mein apni ridaa mein rahtaa huun
aur apne khvaab ki aab-o-havaa mein rahtaa huun

apnaa aap nahin hai sab kuchh apne aap se niklo
badbuein phailaa detaa hai paani kaa Thahraao

usi peD ke niche dafn bhi honaa hogaa
jis ki jaD par main ne apnaa naam likhaa hai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

ik sadma-e-mohabbat ik sadma-e-judaai
ginti ke do hain lekin laakhon ki jaan par hain

vo dard huun koi chaara nahin hai jis kaa kahin
vo zakhm huun ki hai dushvaar indimaal miraa

main tanhaa laDki dayaar-e-shab mein jalaaun sach ke diye kahaan tak
siyaahkaaron ki saltanat mein main kis tarah aaftaab likkhun