jaane kyon hijr ke sabhi mausam — Meraj Naqvi

khud-kushi bhi haraam hai yaa-rab
dil ki vahshat kaa kyaa 'ilaaj karun

niind mein bhi hai sharm chehre par
khvaab mein mujh se mil rahi ho kyaa

tum mire khvaab mein nahin aanaa
TuuT jaate hain mere khvaab sabhi

pahle hansne to do musibat par
phir ye socheinge kyaa kiyaa jaae

kyaa karte us se haath milaa kar bataaiye
dil kaise miltaa jis se tabi'at nahin mili

ham tire hijr ki sabhi raatein
pi ke cigarette guzaar dete hain

vasl ko maan ke taraste hain mire bachche bhi
kaifiyat hijr ki mujh par hi nahin taari hai

vasl mein suukh gai hai miri sochon ki zamin
hijr aae to miri soch ko shaadaab kare

aakhiri baar aayaa thaa milne koi
hijr mujh ko milaa vasl ki shaam mein

main mariz huun tire hijr kaa zaraa haath mein miraa haath le
tu ghamon kaa mere ilaaj kar miri baat sun tu abhi na jaa

meri khvaahish hai ki ji bhar ke use dekh to luun
hijr ke mumkina sadmaat se pahle pahle

kuchh aur vus'atein darkaar hain mohabbat ko
visaal-o-hijr pe daar-o-madaar mushkil hai