sadme se baal shisha-e-gardun mein paD gayaa — Muneer Shikohabadi

khuub taazir-e-gunaah-e-ishq hai
naqd-e-jaan lenaa yahaan jurmaana hai

sunti hai roz naghma-e-zanjir-e-aashiqaan
vo zulf bhi hai silsila-e-ahl-e-chisht mein

jis roz main gintaa huun tire aane ki ghaDiyaan
suraj ko banaa deti hai sone ki ghaDi baat

haath milvaate ho tarsaae gilauri ke liye
kaf-e-afsos na mal jaae kahin paanv mein

jab kabhi maski kaTori kyaa sadaa paidaa hui
karti hai angiyaa ki chiDiyaa chahchahaane ki havas

ho gayaa maamur aalam jab kiyaa darbaar-e-aam
takhliya chaahaa to duniyaa saaf khaali ho gai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

kyon nahin dekhtaa hai vo muD kar
mar gaiin raah mein sadaaein kyaa

ruuh ke viraan tah-khaane tak roz koi aa jaataa hai
tanhaai ke mausam vaali khaali raah-guzaaron se

na kohkan hai na majnun ki the mire hamdard
main apnaa dard-e-mohabbat kahun to kis se kahun