vatan ki ret zaraa eDiyaan ragaDne de — Muzaffar Warsi

Dubone vaalon ko sharminda kar chukaa hungaa
main Duub kar hi sahi paar utar chukaa hungaa

main ne noch ke pheinkin jo shiknein chaadar se
vo sab shiknein duniyaa maathe par le aai

kaahkashaan ke khvaab 'muzaffar' dekh rahaa thaa
aur bedaari ret ke Tiile par le aai

yuun mahsus huaa apni gahraai mein jaa kar
jaise koi mauj kinaare par le aai

ham karein baat dalilon se to rad hoti hai
us ke honTon ki khamoshi bhi sanad hoti hai

kuchh na kahne se bhi chhin jaataa hai ejaaz-e-sukhan
zulm sahne se bhi zaalim ki madad hoti hai

hai ajab nizaam zakaat kaa mire mulk mein mire des mein
ise kaaTtaa koi aur hai ise baanTtaa koi aur hai

azmat-e-mulk is siyaasat ke
haath nilaam ho rahi hai ab

na hogaa raaegaan khun-e-shahidaan-e-vatan hargiz
yahi surkhi banegi ek din unvaan-e-aazaadi

khudaa ai kaash 'naazish' jite-ji vo vaqt bhi laae
ki jab hindostaan kahlaaegaa hindostaan-e-aazaadi

paara-e-dil hai vatan ki sarzamin mushkil ye hai
shahr ko viraan yaa is dil ko viraana kahein

main mulk-badar sabr bhi kar sakti thi lekin
ye dekhnaa thaa zulm ki sarhad hai kahaan tak