raat bhar khvaab dekhne vaale — Naseer Ahmad Nasir

havaa gum-sum khaDi hai raaste mein
musaafir soch mein Duubaa huaa hai

jab pukaaraa kisi musaafir ne
raaste khaaiyon mein chikh uThe

falsafe saare kitaabon mein ulajh kar rah gae
dars-gaahon mein nisaabon ki thakan baaqi rahi

khamoshi jhaankti hai khiDkiyon se
gali mein shor saa phailaa huaa hai

mohabbat ke Thikaane DhunDhti hai
badan ki laa-makaani mausamon mein

log phirte hain bhare shahr ki tanhaai mein
sard jismon ki salibon pe uThaa kar chehre

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

ye kyaa ki khayaalon se uDi jaati hai khushbu
main ne to abhi tak use sochaa bhi nahin hai

jab nigaahon ke ishaaraat badal jaate hain
khud-ba-khud pyaar ke jazbaat badal jaate hain

aap jaate to hain us bazm mein 'shibli' lekin
haal-e-dil dekhiye izhaar na hone paae