nae yaaron se bhi is shakhs ki saahib-salaamat hai — Niaz Sawati

ragaDnaa paD rahaa hai sar har ik voter ke paanv par
isi baais to ham ko membari achchhi nahin lagti

daulat ki rel-pel hai ab ghar mein is liye
custam kaa ik clerk huun teacher nahin huun main

qatar se na laate agar maal-o-daulat
mohalle mein izzat tumhaari na hoti

jab ki pahlu se yaar uThtaa hai
dard be-ikhtiyaar uThtaa hai

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

jo ghair the vo isi baat par hamaare hue
ki ham se dost bahut be-khabar hamaare hue

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

barseingi aaj rahmatein aamad hai yaar ki
naayaab hain ye ghaDiyaan tire intizaar ki