main ajnabi huun magar tum kabhi jo sochoge — Nusrat Gwaliari

vo gulaabi baadalon mein ek niili jhiil si
hosh qaaem kaise rahte thaa hi kuchh aisaa libaas

milnaa paDtaa hai hamein khud se bhi ghairon ki tarah
us ne maahaul hi kuchh aisaa banaa rakkhaa hai

qaanun jaise kho chukaa sadiyon kaa e'timaad
ab kaun dekhtaa hai khataa kaa hai rukh kidhar

husn utnaa ek paikar main simaT saktaa nahin
tu bhi mere hi kisi ehsaas ki tasvir hai

kuchh ehtiyaat parinde bhi rakhnaa bhuul gae
kuchh intiqaam bhi aandhi ne badtarin liye

raat ke lamhaat khuni daastaan likhte rahe
subh ke akhbaar mein haalaat behtar ho gae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo aur honge jin ko hai fikr-e-ziyaan-o-sud
duniyaa se be-niyaaz hai meri ghazal kaa rang

ab us ko sochte hain aur hanste jaate hain
ki tere gham se ta'alluq rahaa hai kitni der

ye na socho kal kyaa ho
kaun kahe is pal kyaa ho

havas na puuri hui jab kahin to 'ilm huaa
tire badan kaa rahaa mujh ko aasraa baDi der