shaayad kisi ki yaad kaa mausam phir aa gayaa — Owais Ahmad Dauran

bahti nahin hai mard ki aaankhon se ju-e-ashk
lekin hamein bataao ki ham kis liye hansein

ye sehn-e-gulistaan nahin maqtal hai rafiqo!
har shaakh hai talvaar yahaan, jaagte rahnaa

un makaanon mein bhi insaan hi rahte honge
raunaqein jin mein nahin aap ki mahfil ki si

paivand ki tarah nazar aataa hai bad-numaa
pukhta makaan kachche gharon ke hujum mein

kuchh dard ke maare hain kuchh naaz ke hain paale
kuchh log hain ham jaise kuchh log hain tum jaise

sab mastiyon mein pheinko na patthar idhar udhar
divaano! is dayaar mein shishe ke ghar bhi hain

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

yaad mein teri jahaan ko bhultaa jaataa huun main
bhulne vaale kabhi tujh ko bhi yaad aataa huun main

judaai kyuun dilon ko aur bhi nazdik laati hai
bichhaD kar kyuun ziyaada pyaar kaa ehsaas hotaa hai

vo shakhs yaadon kaa mujh ko ghulaam karte hue
gayaa bhi to miri nindein haraam karte hue

main apnaa kaar-e-vafaa aazmaaungaa phir bhi
kahaan main tere sitam yaad karne vaalaa huun