aakhri hichki tire zaanun pe aae — Qateel Shifai

abhi to baat karo ham se doston ki tarah
phir ikhtilaaf ke pahlu nikaalte rahnaa

apne haathon ki lakiron mein sajaa le mujh ko
main huun teraa tu nasib apnaa banaa le mujh ko

nikal kar dair-o-kaaba se agar miltaa na but-khaana
to Thukraae hue insaan khudaa jaane kahaan jaate

kyuun sharik-e-gham banaate ho kisi ko ai 'qatil'
apni suuli apne kaandhe par uThaao chup raho

qatil apnaa muqaddar gham se begaana agar hotaa
to phir apne paraae ham se pahchaane kahaan jaate

ab jis ke ji mein aae vahi paae raushni
ham ne to dil jalaa ke sar-e-aam rakh diyaa

sabhi se jab mohabbat chaahte ho
mohabbat kyon nahin karte sabhi se

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

zabaan tak jo na aae vo mohabbat aur hoti hai
fasaana aur hotaa hai haqiqat aur hoti hai

sab mumkin thaa pyaar mohabbat hanste chehre khvaab-nagar
lekin ek anaa ne kitne bhole din barbaad kiye

fasaane yuun to mohabbat ke sach hain par kuchh kuchh
baDhaa bhi dete hain ham zeb-e-daastaan ke liye

dil qanaaat zaraa si kartaa to
har mohabbat thi aakhiri meri