yaani koi kami nahin mujh mein — Ramzi Asim

khinch laai hai tire dasht ki vahshat varna
kitne dariyaa hi miri pyaas bujhaane aate

ishq thaa aur aqidat se milaa karte the
pahle ham log mohabbat se milaa karte the

yaa unhein aati nahin bazm-e-sukhan-aaraai
yaa hamein bazm ke aadaab nahin aate hain

tamaam shahr giraftaar hai aziyyat mein
kise kahun mire ahbaab ki khabar rakkhe

miri jagah pe koi aur ho to chikh uTThe
main apne aap se itne savaal kartaa huun

tumhaare saath kai ranj baanTne hain hamein
so ek din ke liye zindagi se fursat lo