ishq thaa aur aqidat se milaa karte the — Ramzi Asim

yaani koi kami nahin mujh mein
yaani mujh mein kami usi ki hai

khinch laai hai tire dasht ki vahshat varna
kitne dariyaa hi miri pyaas bujhaane aate

yaa unhein aati nahin bazm-e-sukhan-aaraai
yaa hamein bazm ke aadaab nahin aate hain

tamaam shahr giraftaar hai aziyyat mein
kise kahun mire ahbaab ki khabar rakkhe

miri jagah pe koi aur ho to chikh uTThe
main apne aap se itne savaal kartaa huun

tumhaare saath kai ranj baanTne hain hamein
so ek din ke liye zindagi se fursat lo

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

Tapak ke dida-e-nam se sadaaein detaa hai
jo ek harf-e-tamannaa dil-e-tabaah mein thaa

'abas dil be-kasi pe apni tuun har vaqt rotaa hai
na kar gham ai divaane 'ishq mein aisaa hi hotaa hai

vasl hai un ki adaa hijr hai un kaa andaaz
kaun saa rang bharun ishq ke afsaanon mein