chilchilaati-dhup thi lekin thaa saaya ham-qadam — Sabir

fasl boi bhi ham ne kaaTi bhi
ab na kahnaa zamin banjar hai

us ke shar se main sadaa maangtaa rahtaa huun panaah
isi duniyaa se mohabbat bhi balaa ki hai mujhe

hans hans ke us se baatein kiye jaa rahe ho tum
'saabir' vo dil mein aur hi kuchh sochtaa na ho

tire tasavvur ki dhuup oDhe khaDaa huun chhat par
mire liye sardiyon kaa mausam zaraa alag hai

ye kaarobaar-e-mohabbat hai tum na samjhoge
huaa hai mujh ko bahut faaeda khasaare mein

ham us ki khaatir bachaa na paaeinge umr apni
fuzul-kharchi ki ham ko aadat si ho gai hai

mohabbat karne vaale dard mein tanhaa nahin hote
jo ruThoge kabhi mujh se to apnaa dil dukhaaoge

yaar tanhaa ghar mein hai afsos lekin ham nahin
huur to hai gulshan-e-firdaus mein aadam nahin

vasl mein khaali hui ghair se mahfil to kyaa
sharm bhi jaae to main jaanun ki tanhaai hui

go mujhe ehsaas-e-tanhaai rahaa shiddat ke saath
kaaT di aadhi sadi ek ajnabi aurat ke saath

saamne umr paDi hai shab-e-tanhaai ki
vo mujhe chhoD gayaa shaam se pahle pahle

akelaa ho rah-e-duniyaa mein gir chaahe bahut jiinaa
hui hai faiz-e-tanhaai se umr-e-khizr tulaani