sar-e-shaam luT chukaa huun sar-e-aam luT chukaa huun — Sabir Zafar

duur tak ek khalaa hai so khalaa ke andar
sirf tanhaai ki surat hi nazar aaegi

us se bichhaD ke ek usi kaa haal nahin main jaan sakaa
vaise khabar to har pal mujh tak duniyaa bhar ki aati rahi

ham itnaa chaahte the ek dusre ko 'zafar'
main us ki aur vo meri misaal ho ke rahaa

apni yaadein us se vaapas maang kar
main ne apne-aap ko yakjaa kiyaa

main aise jamghaTe mein kho gayaa huun
jahaan mere sivaa koi nahin hai

har shakhs bichhaD chukaa hai mujh se
kyaa jaaniye kis ko DhunDhtaa huun

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

maarka garm to ho lene do khun-rezi kaa
pahle shamshir ke niche hamin jaa baiTheinge

gul kiyaa jis ne vo thaa aur magar
shama ne shikva havaaon se kiyaa

ghazal mein jab talak ehsaas ki shiddat na ho shaamil
faqat alfaaz ki kaarigari mahsus hoti hai

dil ki dahliz pe jab shaam kaa saaya utraa
ufuq-e-dard se siine mein ujaalaa utraa

vahi rusvaai kaa meri sabab aakhir bane maulaa
vahi jo log kal shaamein suhaani karne vaale the