ab zaminon ko bichhaae ki falak ko oDhe — Saleem Siddiqui

miTTi ki fazilat pe bahut she'r kahe hain
sone se likhaa jaaegaa divaan hamaaraa

aankhein taDap rahi hain miri kuchh khayaal kar
band-e-qabaa ko khol badan ko bahaal kar

kaun sukhe hue phulon ki taraf dekhtaa hai
zakhm thoDe se hare hon to numaaish karein ham

huun paarsaa tire pahlu mein shab guzaar ke bhi
main be-libaas nahin pairahan utaar ke bhi

ham aadmi ki tarah ji rahe hain sadiyon se
chalo 'salim' ab insaan ho ke dekhte hain

umr bhar jis ke liye peT se baandhe patthar
ab vo gin gin ke khilaataa hai nivaale mujh ko

pyaaso raho na dasht mein baarish ke muntazir
maaro zamin pe paanv ki paani nikal paDe

barsaat kaa baadal to divaana hai kyaa jaane
kis raah se bachnaa hai kis chhat ko bhigonaa hai

aae kuchh abr kuchh sharaab aae
is ke baa'd aae jo azaab aae

ik dhuup si tani hui baadal ke aar-paar
ik pyaas hai ruki hui jharne ke baavajud

abr kaa saaya o sabza raah kaa
jaan-e-man rath ki savaari yaad hai

badan par is-qadar baarish mire hoti hai boson ki
ki jab baanhein tiri mujh par khuli hon Daaliyaan ban kar