main sadaa de ke use rok na paayaa afsos — Saleem Siddiqui

miTTi ki fazilat pe bahut she'r kahe hain
sone se likhaa jaaegaa divaan hamaaraa

aankhein taDap rahi hain miri kuchh khayaal kar
band-e-qabaa ko khol badan ko bahaal kar

kaun sukhe hue phulon ki taraf dekhtaa hai
zakhm thoDe se hare hon to numaaish karein ham

huun paarsaa tire pahlu mein shab guzaar ke bhi
main be-libaas nahin pairahan utaar ke bhi

ham aadmi ki tarah ji rahe hain sadiyon se
chalo 'salim' ab insaan ho ke dekhte hain

umr bhar jis ke liye peT se baandhe patthar
ab vo gin gin ke khilaataa hai nivaale mujh ko

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

na guftugu mein tasalli na khaamushi mein sadaa
suluk-e-dost kaa andaaz hi niraalaa hai

ghamon par muskuraa lete hain lekin muskuraa kar ham
khud apni hi nazar mein chor se maalum hote hain