jo mire sochne ki baatein hain — Samar Kabir

miyaan majnun to kab ke mar chuke hain
magar haathon mein patthar hai abhi tak

koi jaldi nahin hai soch lenaa
abhi inkaar ki gunjaaishein hain

in gharib logon ki ye 'ajib mushkil hai
sar jhukaa ke kahte hain sar nahin jhukaaeinge

raat basti jali gharibon ki
subh akhbaar ho gae raushan

qadam qadam pe mire khvaab jal rahe hain yahaan
main is zamin ko jannat banaane aayaa thaa

meri mazduri ke paise mujhe de do maalik
aaj beTi miri sasuraal se aai hui hai

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

ham 'jaun-eliyaa' ke zamaane mein dosto
'ghaalib' kaa intikhaab liye sochte rahe

apne gham ki fikr na ki is duniyaa ki gham-khvaari mein
barson ham ne dast-e-junun se kaam liyaa daanaai kaa

az-sar-e-nau fikr kaa aaghaaz karnaa chaahiye
be-par-o-baal sahi parvaaz karnaa chaahiye

zaraa Thahro use aane do us ki baat bhi sun lein
hamein jo ilm hai go dil ko dahlaane hi vaalaa hai