chalo baanT lete hain apni sazaaein — Sardar Anjum

zindagi ik imtihaan hai imtihaan kaa Dar nahin
ham andheron se guzar kar raushni kahlaaeinge

gham-e-hayaat kaa jhagDaa miTaa rahaa hai koi
chale bhi aao ki duniyaa se jaa rahaa hai koi

ghamon ne gher liyaa hai mujhe to kyaa gham hai
main muskuraa ke jiyungaa tiri khushi ke liye

kabhi kabhi tu mujhe yaad kar to leti hai
sukun itnaa saa kaafi hai zindagi ke liye

sabhi ne lagaayaa hai chehre pe chehra
kise yaad rakkhein kise bhuul jaaein

vo moD jis ne hamein ajnabi banaa Daalaa
us ek moD pe dil ab bhi gungunaataa hai

mere khvaabon ke jharokon ko sajaate rahiye
na sahi vasl magar yaad to aate rahiye

bas itnaa yaad hai ik bhuul si hui thi kahin
ab is se baDh ke dukhon kaa hisaab kyaa rakhnaa

vo un kaa vaada vo ifaa-e-ahd kaa aalam
ki yaad bhi nahin aataa hai bhultaa bhi nahin

jab bhi fursat mili hangaama-e-duniyaa se mujhe
meri tanhaai ko bas teraa pata yaad aayaa

garmi-e-ishq khilaa deti hai gaalon pe gulaab
yaad aate hain jo lamhaat gai raaton ke

aaj parvaaz khayaalon ki judaa si paai
aaj phir bhuli hui yaad kisi ki aai