gham-e-hayaat kaa jhagDaa miTaa rahaa hai koi — Sardar Anjum

chalo baanT lete hain apni sazaaein
na tum yaad aao na ham yaad aaein

zindagi ik imtihaan hai imtihaan kaa Dar nahin
ham andheron se guzar kar raushni kahlaaeinge

ghamon ne gher liyaa hai mujhe to kyaa gham hai
main muskuraa ke jiyungaa tiri khushi ke liye

kabhi kabhi tu mujhe yaad kar to leti hai
sukun itnaa saa kaafi hai zindagi ke liye

sabhi ne lagaayaa hai chehre pe chehra
kise yaad rakkhein kise bhuul jaaein

vo moD jis ne hamein ajnabi banaa Daalaa
us ek moD pe dil ab bhi gungunaataa hai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

nazar bachaa ke jo aansu kiye the main ne paak
khabar na thi yahi dhabbe baneinge daaman ke

bataa khud ko bhalaa kaise sanvaarun
mujhe gham aainon mein dikh rahaa hai

us pe qurbaan ki jis ne tiri aavaaz suni
sadqe us aankh ke jis ne tiraa jalva dekhaa