ik yahi soch bichhaDne nahin deti tujh se — Shabana Yousaf

abhi se chhoTi hui jaa rahi hain divaarein
abhi to beTi zaraa si miri baDi hui hai

mujh ko bhi kar degaa rusvaa vo zamaane bhar mein
khud bhi ho jaaegaa badnaam yahi lagtaa hai

khud charaaghon ko andheron ki zarurat hai bahut
raushni ho to unhein log bujhaane lag jaaein

mere aane ki khabar sun ke vo dauDaa aataa
us ko pahunchaa nahin paighaam yahi lagtaa hai

agar bichhaDne kaa us se koi malaal nahin
'shabaanaa' ashk se phir aankh kyuun bhari hui hai

ye to sochaa hi nahin us ko judaa karte hue
chun liyaa hai gham bhi khushiyon ko rihaa karte hue

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

yaad aati hai achchhi si koi baat sar-e-shaam
phir subh talak sochte rahte hain vo kyaa thi

mujh ko ye soch hai jiite hain ve kyun-kar yaa-rab
apne maashuqon se jo shakhs judaa rahte hain

naaseh yahaan ye fikr hai siina bhi chaak ho
hai fikr-e-bakhiya tujh ko garebaan ke chaak mein

pahle har baat pe ham sochte the
ab faqat haath uThaa dete hain