mujh ko bhi kar degaa rusvaa vo zamaane bhar mein — Shabana Yousaf

abhi se chhoTi hui jaa rahi hain divaarein
abhi to beTi zaraa si miri baDi hui hai

ik yahi soch bichhaDne nahin deti tujh se
ham tujhe baad mein phir yaad na aane lag jaaein

khud charaaghon ko andheron ki zarurat hai bahut
raushni ho to unhein log bujhaane lag jaaein

mere aane ki khabar sun ke vo dauDaa aataa
us ko pahunchaa nahin paighaam yahi lagtaa hai

agar bichhaDne kaa us se koi malaal nahin
'shabaanaa' ashk se phir aankh kyuun bhari hui hai

ye to sochaa hi nahin us ko judaa karte hue
chun liyaa hai gham bhi khushiyon ko rihaa karte hue

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

ret par ik nishaan hai shaayad
ye hamaaraa makaan hai shaayad