siyaah shab mein charaaghon se dosti karnaa — Sharib Mauranwi

kisi ko maar ke khush ho rahe hain dahshat-gard
kahin pe shaam-e-gharibaan kahin divaali hai

peD ke niche zaraa si chhaanv jo us ko mili
so gayaa mazdur tan par boriyaa oDhe hue

saron pe oDh ke mazdur dhuup ki chaadar
khud apne sar pe use saaebaan samajhne lage

sab ek jaisi hain duniyaa ki ‘auratein lekin
tumhaare Dasne kaa andaaz mukhtalif Thahraa

qafas ke band parinde hain jin ki aankhon mein
asiri ghumti rahti hai qaid-khaanon ki

puuri duniyaa mujhe fankaar samajhti hai to kyaa
mere ghar vaale to naakaara samajhte hain mujhe

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

jab ki pahlu se yaar uThtaa hai
dard be-ikhtiyaar uThtaa hai

kaabe ko jaataa kis liye hindostaan se main
kis but mein shahr-e-hind ke shaan-e-khudaa na thi

yaad aai hai to phir TuuT ke yaad aai hai
koi guzri hui manzil koi bhuli hui dost

baat karnaa pyaar ki aasaan se aasaan hai
ishq karnaa karte rahnaa hai kaThin se bhi kaThin

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh